கடை நிலை ஊழியர்கள் - (தொடர் பதிவு)

பதிவர் தானை.தலைவி அவர்கள்,தம்முடைய கடைநிலை ஊழியர்கள் பற்றிய பதிவை தொடர்ந்து எழுதி நிறைவு செய்யுமாறு கோரியுள்ளார்(.மேடம் உங்க பதிவுக்கு பெயர் வைக்கவில்லையே அது ஏன்?? பெயர் சூட்டுவிழா நடத்த வேண்டாமா??)

என்னை தொடர் பதிவிர்க்கு அழைத்தமைக்கு நன்றி.

முதலில் தெருக்களில் குப்பையை சேகரிப்பவர்கள் மற்றும் கழிவு நீர் அகற்றும் பணியில் உள்ளவர்கள்..



இவர்கள்,தங்களது பணியினை சரியாக செய்யாமல் போனால்?? என்ன ஆகும் என்று யோசித்திருக்கிறோமா?

 என்ன ஆகும்?? தெருவெல்லாம் குப்பைமயமாக இருக்கும்,கழிநீர் சரிவர செல்லாது......என்ன இது சின்ன குழந்தைக்கு சொல்லுவது போல இருக்கிறதா? இல்லை பள்ளிக்கூட கட்டுரை மாதிரி இருக்கிறதா? இருந்தாலும் பரவயில்லை யோசித்து பார்க்கலாம்......



நாமாவது நம் வீட்டைதான் சுத்தமாக வைத்துக்கொள்ள முயற்சிக்கிறோம்,அவர்கள் நம் தெருவை,ஊரை,நாட்டை சுத்தமாக வைத்துக்கொள்ள உதவுகிறார்கள்.

வீட்டில் வாசலில் குப்பைதொட்டியை வைத்துவிட்டு அதை எடுக்க அவர்கள் வரவில்லை என்றால்,  “வாசல்ல இரண்டு நாளா குப்பை அப்படியே இருக்கு,ஒரே நாத்தமா இருக்கு,எங்க போனான் இந்த குப்பை வண்டிக்காரன்,எடுத்துண்டு போக கூடாதா?” என்று புலம்பித்தள்ளிவிடுவோம்.

ஒரு நாள் அவர் வராமல் போனாலே நாற்றம் அடிக்கும் குப்பை!!ஆனால் அவர்களோ தினம் தினம் இந்த நாற்றத்தில்தான் பணி புரிய வேண்டும். எவ்வளவு கஷ்டம்?

அடுத்து அலுவகத்தில் பணிபுரியும் அலுவலக உதவியாளர்கள்.அவர்கள் கோப்புகளை கொண்டுசெல்ல உதவுவதுடன்,நமக்கு சரியான நேரத்தில் காபி,டீ டிபன் வாங்கி வந்து உதவுகிறார்கள்.



அலுவலக வேலைக்கு நடுவில் தலைவலியா?உடனே கூப்பிடு அவரை, “தலைவலி அதிகமாக இருக்கு கொஞ்சம் போய் தைலமும் மாத்திரையும் வாங்கி வருகிரீர்களா” என்றால் உடனே உதவிக்கு ஓடி வருகிறார்கள்.

அவர்களும் மனிதர்கள்தான் ஆனால் நம்மைவிட ஒரிரண்டு நிலை கீழே பணிபுரிவதால் அவர்களை விரட்டி வேலை வாங்க வேண்டும் என்று கூறுபவர்களை பார்த்தால் எனக்கு கோபமாக வரும்.

நான் பணியில் இருந்த சமயம்,அலுவலகத்தில் சமவயது உள்ளவர்களை பெயர் சொல்லியும், பெரியவர்களை சார், மேடம் என்றும் அழைப்பேன்.அதே மாதிரி அலுவலக உதவியாளர்களில் வயதானவர்களை சார் என்று கூப்பிடுவேன்.

அதற்கு ஒரு உதவியாளர் “என்னம்மா நீங்க என்னப்போய் சார்ன்னு சொல்லரீங்க நான் பியூன் தான்” என்றார். நான் அவரிடம் “பாருங்க அந்த உதவி இயக்குனர் என் சம வயது உடையவர்தான் ஆனால் அவரை சார் என்றுதான் கூப்பிடுவேன் ஏன் என்றால் அவருடைய பதவிக்கு நாம் தரும் மரியாதை.அதே மாதிரி நீங்க பியுனாக இருந்தாலும் வயதில் மூத்தவர்.அதனால் சார்” என்றவுடன் அவர் அடைந்த மகிழ்ச்சியை என்னால் உணரமுடிந்தது.



அடுத்து நம் வீடுகளில் வேலை செய்பவர்கள்.இவர்களை பற்றி கூறவே வேண்டாம் அவர்கள் இல்லை என்றால் நமக்கு ஒரு கை இல்லாத மாதிரியே இருக்கும்.அதிலும் கணவன் மனைவி இருவரும் வேலைக்கு போகும் பல வீடுகளில் அவர்களது தேவை அத்தியாவசியமான ஒன்றாக இருக்கு.

நான் இதுநாள் வரை வீட்டு வேலைக்கு யாரையும் வைத்துக்கொள்ளவில்லை. தற்சமயம் கடந்த ஒரு மாதமாகத்தான் ஒருவர் எனக்கு உதவியாக வீடு பெருக்கி துடைத்து கொடுத்துவிட்டு செல்கிறார்.

அவர் பெயர்,“ரத்னா”. சுத்தமாக வேலை செய்வார். பளிச்சென்று உடையுடன் வருவார். எது சொன்னாலும் சரி என்று கேட்டுக்கொண்டு அந்த வேலையை செய்து முடித்து கொடுப்பார்.

இவர்களை தவிர பள்ளிக்கூடங்கள்,ஆஸ்பத்திரிகளில் வேலை செய்யும் ஆயா அவர்கள், கட்டிடங்களில் வேலைபார்க்கும் வாட்ச்மேன் போன்றோர்,என கடைநிலை ஊழியர்கள் நிறைய பேர்கள்..

அவர்கள் தொடர்ந்து வேலை செய்யும் போது நாம் அவர்களைப்பற்றி நினைப்பதே இல்லை.ஆனால் ஒருநாள் இவர்களில் யாராவது வராமல் போனால் நாம் எவ்வளவு அவதி படுகிறோம்.இந்த அவதியை நாம் எல்லோரும் உணர்ந்திருப்போம்.

கடைநிலை ஊழியர்தானே என்று பார்க்காமல் அவர்களால் நடத்திக்கொடுக்கப்படும் மேன்மையான வேலைகளை பார்த்தோமானால் அவர்களையும் மேல்நிலை ஊழியர்களே என்று சொல்லலாம்.
--------------------------------------------------------------------------------------------------------